Færslur undir „Lummmulegar Uppskriftir“

Grýta

Laugardagur, 31. mars 2012

Ég átti afgangs rauð- og hvít hrísgrjón og ákvað að henda saman í grýtu. Ég held að þetta sé svipað og pakkagrýta, nema bara hollari.

006.JPG

3 hvítlauksrif
Púrrulaukur
hakk
1 dós heilir tómatar
Hálf rauð paprika, frekar smátt skorin
Afgangs hrísgrjón
Maldon saltflögur
Svartur pipar
Kjúklingakrydd frá Pottagöldrum
Chilliflögur

Ég skar hvítlaukinn á ítalskan máta, þeir berja rifið, taka hýðið af druslunni og saxa hann svo. Við þetta losnar víst um olíur í hvítlauknum.

Ég steikti á pönnu 3 hvítlauksrif og afgangs púrrulauk, síðan skellti ég svínahakki á pönnu og steikti þetta allt saman voða vel.

Í blandarann skellti ég einni dós af heilum tómötum, salti, svörtum pipar, þurrkuðum chilliflögum (er í poka, fæst t.d. í Krónunni) og kjúklingakryddi frá Pottagöldrum og blandaði vel saman. Ég setti með í smástund paprikubitana til að fá bitana aðeins minni.

Þegar hakkið var tilbúð setti ég á pönnuna hrísgrjónin, sem voru soðin fyrir, og brasaði þau í smástund, síðan sósuna og um dl af vatni (má vera að það þurfi meira að minna).

Ég leyfði þessu að malla þangað til þykkt, kryddaði þar til það féll að mínum smekk, skellti þessu á ristað brauð og ost yfir. Það er örugglega mjög gott að nota annars konar ostabita, t.d. fetaost, ljúfling, kastala eða kotasælu, vera með þessu kartöflumús, þunnt sneitt gufusoðið grænmeti eða hvað þér þykir gott.
010.jpg

Biribmm biribamm

Heimatilbúin eplamús

Sunnudagur, 11. mars 2012

Ef þú kaupir matinn tilbúinn, þá er sykur í honum. Nema kannski í heilsubúðum, en þá er það dýrt.

Ég þurfti á tímabili að útiloka glúkósa og sætuefni og þá gat ég bara borðað hrökkbrauð, brauð, ost, mjólk, hreinar mjólkurvörur, óunnið kjöt og óunnin fisk, grjón og hrein krydd og hreinar kryddblöndur. Sykri er troðið í allt. Ef það er ekki sykur í því er sætuefni. Við viljum ekki finna annað en gott bragð, helst sætt. Við fitjum upp á nefið eins og smákrakkar og ojum yfir einhverju sem við kunnum ekki við, jafnvel við mat sem smakkast ágætlega. Nei, við getum ekki lagt það á aumingja okkur að bragða á mat sem þóknast ekki sætuþörf okkar. Það er ekkert endilega við okkur að sakast, þetta erum við alin upp við. En við getum alveg harkað af okkur og troðið í ginið á okkur einstaka matvælum sem bragðast la la.

En það var ekki alveg það sem ég ætlaði að tala um. Ég ætlaði að hrista fram uppskrift af heimatilbúinni eplamús sem ég var að enda við að henda í frystinn. Ég set alltaf 2 mola af eplamús út á hafragrautinn á morgnanna, ásamt handfylli af bláberjum. Ég kaupi tröllahafra, þeir eru miklu bragðbetri og ekki eins klístraðir. Vissir þú að kílóverðið af tröllahöfrum er helmingi minna en af seríósi?

Aftur að efninu, ég var með 3 stór jónagold epli, afhýdd og kjarnahreinsuð. Ég skar eplin í grófa bita og fleygði þeim í pott ásamt matskeið af kanil (sagður vera ægilega hollur). Ég setti vatn upp að ca hálfri eplahrúgunni, ekki láta fljóta yfir nema þig langi frekar í eldaðan þreyting. Ég leyfði suðunni að koma upp, tók pottinn af hellunni og leyfði þessu að kólna aðeins.

Ég maukaði eplin í matvinnsluvél, alveg eins hægt að nota kartöflustappara eða gaffal (tekur bara lengri tíma og tekur vel á, það er aldrei slæmt). Þegar eplamúsin var orðin alveg köld hóf ég það subbulega starf að setja hana í klakapoka.

Ég stakk trekt ofan í opið á pokanum og notaði kínaprjón til að ýta eplamúsinni ofan í pokann. Ef hún lekur vel ofan í er hún líklegast of þunn. Síðan verður að kreista eplamúsina niður, bara ekki of fast því þá springur pokinn (já ég fékk að reyna það á eigin skinni).

Sykurlaus eplamús smakkast svo bara ægilega vel, það er algjör óþarfi að sæta epli - þau eru alveg nógu sæt fyrir.

Biribimm biribamm

Spínatsalat

Sunnudagur, 12. febrúar 2012

Mikið af spínati, lambakjöt (ég var með ofnbakaðar framhryggsneiðar), blaðlaukur og fetaostur - afar gott. Það var ekki einu sinni afgangabragð af lambinu daginn eftir.

Biribimm biribamm

Búst

Laugardagur, 11. febrúar 2012

Frosinn ananas og vatn, þarft ekki meira. Bragðgott og ferskt, en það er að sjálfsögðu ekkert að því að skella í þetta sætuefni af einhverju tagi. Blandarinn minn eyðilagðist og því er ég að nota matvinnsluvél til að útbúa mína bústa, það er bara nokkuð gott að hafa kjötið með.

Í ananas er mikið af mangan og C vítamíni.

Mangan er virkur þáttur í ýmisskonar ensímum, þar með talið ensímum sem stjórna blóðsykri, orkuframleiðslu og skjarlkirtilsstarfsemi. Það er ómissandi við framleiðslu líkamans á andoxunarensíminu SOD (superoxide dismutase) sem hefur jákvæð áhrif á fólk með gigt og langvarandi bólgusjúkdóma. Mangan er mikilvægt fyrir efnaskipti prótíns og fitu, heilbrigði tauga og ónæmiskerfið. Eðlilegur beinvöxtur, myndun brjósks og liðvökva er allt háð nærveru mangans. Líkaminn þarfnast þess einnig við nýtingu B1- og E-vítamíns”.

“Hlutverk C-vítamíns til viðhalds heilbrigði líkamans er margþætt. Það hefur mikilvægu hlutverki að gegna við myndun bandvefs, er stór þáttur í vexti og heilbrigði æða, beina, góms og tanna ásamt því að auka frásog járns. C-vítamín hjálpar sárum að gróa og eykur viðnám líkamans gegn sýkingum. Líkaminn þarfnast aukins C-vítamíns þegar hann er undir andlegu eða líkamlegu álagi. C-vítamín er sindurvari (andoxunarefni) þ. e. ver frumur líkamans gegn skaðlegum áhrifum stakeinda”.

Tekið af Heilsa.is

Biribimm biribamm

Hakksúpa

Þriðjudagur, 3. janúar 2012

Ég mallaði mér í kvöldmat ægilega góða hakkksúpu.

008.jpg
300 g hakk, ég var með svínahakk
1 rauðlaukur
4 kartöflur, skornar í bita
1 gulrót, skorin í bita
1 sellerístöngull, skorinn í bita (mér finnst sellerí almennt vont en það var fínt í súpunni)
1 dós hakkaðir tómatar
kjúklingakrydd frá pottagöldrum
salt og pipar
tabasco sósa (má sleppa)
400 ml vatn eða soð (ég var með kjúklingasoð)

Laukur og hakk steikt saman í potti, ég var með djúpa wok pönnu. Þegar vel steikt er kartöflum, gulrót og sellerí bætt saman við og þetta steikt saman í smá tíma. Síðan er tómötum ásamt vökva bætt við og síðan vatni. Látið malla í ca 20 mínútur, eða lengur ef þú kýst. Kryddað að smekk, ég vil hafa tabasco til að þetta rífi aðeins í.

Biribimm biribamm

Rusl súpa og ponsu hollusta í eplaköku

Sunnudagur, 3. apríl 2011

Það er ágætt að nýta allt sem er ætt, en er oftast hent, í súpu. Ég átti afskurð af blómkáli (laufin) og græna endann á púrru og mallaði súpu úr því. Fínasta súpa.

2 msk smjör látið bráðna í potti
Frekar fínt söxuð púrran látin malla við hægan hita í 7 mínútur
Afskurðinum hent útí og látið brallast í 10 mínútur í viðbót

1 lítra af vatni sullað saman við ásamt salti, svörtum pipar og eðal-kjúklingakryddi frá pottagöldrum (besta krydd í heimi). Látið sjóða í korter. Annaðhvort að eta súpuna svona heita eða láta hana kólna aðeins og skella henni í matvinnsluvél og vinna hana vel. Mjög góð súpa.

Það er ekki erfitt að troða örlítilli hollustu í baksturinn, og það er meira að segja nokkuð bragðgott. Það er mikill misskilningur að bakkelsi sé vont nema það sé bara hveitiklístur í því. Ég bakaði eplaköku áðan.
1 egg + 125 g af sykri (já ég notaði sykur) hært saman þar til létt og ljóst. 125 g af smjöri hært saman við.
125 g samanlagt af hveitiklíði, hveilhveiti og hveiti (25 g hveiti nóg) og 1 tsk vínsteinslyftiduft (já eða bara venjulegt) hært saman við.

Stappað í form, eplaskífum raðað yfir og smá kanilsykri.
Bakað við 180°C í 30 mín.
Þegar kakan er til er bitum af dökku súkkilaði dreift á kökuna, sett í ofninn (sem búið er að slökkva á) í 1-2 mín. Smyrja súkkulaðinu á alla kökuna og rymja af ánægju með hverri skeið.

Biribimm biribamm

Magans og hjartans boozt

Mánudagur, 24. janúar 2011

Núna eftir jólin eru trönuber á niðursettu verði, einhver skemmd ber inn á milli en kemur samt út í plús. Týna bara út skemmdu berin, skola heilu berin vel og þurrka. Skella þeim síðan í frystinn og nota þau í boozt.

Trönuberjasafi er mikið notaður á ýmsum heilsustofnunum gegn þvagfærasýkingu, oft er gefinn trönuberjasafi áður en reynt er við sýklalyfjameðferð. Trönuber eru stútfull af plöntuhollefnum, flavóníðum. Eitt af þeim efnum húðar þvagblöðruveggina að innan sem gerir bakteríum erfitt fyrir að festa sig.

Einnig hafa plöntuhollefni í trönuberjum  góð áhrif á hjarta- og æðakerfið. Virknin virðist vera mest í heilum berjum, þar sem sum efnin vinna saman en aðskiljast við vinnslu. Rannsóknir hafa sýnt að dagleg inntaka trönuberja eða safa geta komið í veg fyrir að ákveðin ensím sem valda æðakölkun fari af stað.

Trönuber virðast hafa bólgueyðandi áhrif (sérstaklega á tanngóma), minnka líkur á nýrnasteinum, styrkja ónæmiskerfið og minnka líkur á myndun krabbameins.

Einnig eru trönuber talin jafna bakteríuflóruna  í maga, og þar með minnka líkur á magasári.
http://whfoods.org/genpage.php?tname=foodspice&dbid=145

Kalíumríkir bananar hafa löngum þótt hafa góð áhrif á hjarta og æðakerfið með því að halda blóðþrýstingi í skefjum.
Einnig eru bananar taldir góðir til að halda sýrustigi í jafnvægi sem og auka virkni frumna í maga sem framleiða slím. Þannig minnka líkur á magasári.
http://www.whfoods.com/genpage.php?tname=foodspice&dbid=7
Trönuber og banani eru því súper dúper blanda fyrir hjarta og maga.

Magans og hjartans boozt

Hálfur banandi
3 lúkur frosin (eða fersk) trönuber
1 glas af vatni
Blandist og drekkist.

Biribimm biribamm

Góður matur maður!

Sunnudagur, 23. janúar 2011

Sparnaðar blómkálssúpa.

Ég keypti um daginn blómkálshaus sem var innilokaður í laufi. Ég tímdi ekki að henda því og ákvað því bara að búa til súpu úr laufinu. Súpan varð ótrúlega góð. Fylgt er uppskrift af venjulegri blómkálssúpu nema laufin eru soðin í um hálftíma, rétt í restina er bætt við smá blómkáli til að fá kraft, svo rjómanum.

Ódýr, holl og súper dúper góð pizza (fyrir einn).

Slatti af hveitikími, af slumma olíu og dass  vatni, pizzakrydd, hvítlaukspipar og svartur pipar hrært í skál. Klesst á bökunarplötu og jafnað út með höndunum (það er auðveldast)
Þurrkað í 20-30 mín við ca 180° (ekki með blæstri)

Tómatsalsa
einn tómatur skorinn í litla bita
ræma af lauk saxaður
biti af chilli saxaður

Pizzasósu dreift á botninn, síðan ost og tómatsalsa ofan á ostinn. Til að gera pizzuna einstaklega mjúka og djúsi er klessum af hreinum rjómaost laumað hér og þar ofan á. Bakað við 200° hita og aftur, ekki blástur.

Bon apetide

Biribimm biribamm

Prófaþreytu boozt

Laugardagur, 27. nóvember 2010

Æi prófalestur! Þá er setið lon og don lungann úr deginum. Orkan þverneitar að hanga með manni, heilinn fer að flauta lagstúf og rasskinarnar eru orðnar flatar og ljótar. Þá er oft lítið annað að gera en að éta og éta til að halda uppi orkunni. Það er ekki bara það að það sé lýjandi að sitja og læra, heldur tekur heilinn til sín ansi mikið af orku. Ég er allavegana sísvöng þegar ég er mikið að nota þessa elsku.

Eitt ráð er að éta nammi, bounty er t.d. mjög gott. Ég sé bonty í hillingum. Mmmmm bounty! Ég kann að baka bounty köku. Hún er góð. Kannski ég leggi í eina?

Annars held ég að það sé betra að eta og drekka fæðu sem dvelur lengur við orkugjöf í líkamanum heldur en bounty.. nammi.

Var að malla saman orkuboozt, sem er meira að segja merkilega bragðgott

Orkuboozt ala Sonja

1 frosinn spínatkubbur
2 cm engiferbútur
2-3 gulrætur
Trönuberjasafi eftir smekk

Fleygist í blandara, blandað með látum og drukkið með bestu lyst.

0011.JPG
Spínat
Spínat er ríkt af orkugefandi vítamínum eins og járni, B vítamínum, C og E.

Gulrætur
Luteolin, plöntuhollefni í gulrótum, er sagt hjálpa til við virkni heilans

Engifer
Er sagt bæta blóðrásina, sem er ekki vanþörf á þegar heilinn er annars vegar. Hann tekur til sín mikið blóð.

Trönuberjasafi
pakkaður af C vítamíni til að nýta allt þetta járn í spínatinu

Boozt ala Sonja

Mánudagur, 8. nóvember 2010

Venjulega eftir smá skróp í ræktinni, þá fær maður heljarinnar harpðsperrur. Ég er allavegana þannig, að eftir smá pásu geng ég um eins og nírætt gigtveikt gamalmenni. Ég þarf að undirbúa mig andlega undir að arka upp stiga og að teygja mig eftir hlut - sérstaklega ef ég þarf að beygja mig! Ég hef ræstingar að atvinnu og það er bara þjáning.

Fyrir nokkru síðan mallaði ég saman boozt eftir fyrsta ræktartímann eftir skróp og fékk litlar harðsperrur. Ég skrópaði aftur og mallaði sama booztið og enn og aftur var ég að upplifa litlar harðsperrur. Ég finn til, ekki efast um það. En ég get gengið eðlilega og teygt mig, beygt mig, reigt mig og unnið léttilega. Hvað er dásamlegra en að finna harðsperrur án þess að vera nánast farlama?

Harðsperrur fáum við eftir álag á vöðvann. Skemmdir verða á vöðvafrumum sársaukinn kemur fram þegar bólgusvörun verður í vöðvanum og viðgerð hefst.

Boozt ala Sonja

Ca 500 ml (fyrir tvo venjulega, ég fæ mér frekar stórann skammt)

4 hvítkálsblöð
2 gulrætur (eða 1 stór)
1 epli/pera
1 tsk glútamín
300 ml vatn

Mixað í blandara. Mjög bragðgott, verður enn mýkra bragð ef notuð er pera í stað eplis.

Hvítkál
Í hvítkáli er hið margrómaða eða óþarfa prótínið glútamín. Sumir segja að ræktarfólk þurfi það, aðrir að það hafi engin áhrif. Ein rannsókn sýndi að það hefði góð áhrif á bata hjá skurðsjúklingum. Því er sá möguleiki á að það hjálpi til við uppbyggingu á skemmdum vefjum.
Hvítkál er talið hafa bólgueyðandi áhrif, andoxandi áhrif og hjálpar til við vöðvauppbyggingu.

Gulrætur
Eiga þátt í að lagfæra miniháttar sár og meiðsli. Bætir vöðvaheilsu, hefur bólgueyðandi áhrif sem og hefur góð áhrif á blóðsykursjafnvægi.

Epli
Quercetin í eplum hafa bólgueyðandi áhrif.

Biribimm biribamm